विश्वविद्यालय सभा सदस्य स्व. गोविन्द गजुरेलको निधनमा शोक सभा सम्पन्न

मनमोहन प्राविधिक विश्वविद्यालय सभा सदस्य, बोर्ड अफ गभर्नर्सका सदस्य, मनमोहन स्मृति पोलिटेक्निकका भूतपूर्व निर्देशक, भूतपूर्व प्राचार्य, शिक्षाविद श्री गोविन्द गजुरेलज्यूको मिति २०७९/०६/०९ मा भारतको नयाँ दिल्लीमा उपचारका क्रममा असामयिक निधन भएको थियो । उहाँको पार्थिव शरिरलाई आज असोज १० गते पशुपति आर्यघाटमा दाह संस्कार गरिएको यस विश्वविद्यालयका तर्फबाट दाहसंस्कारमा सहभागि बरिष्ट लेखा अधिकृत सुजन भुर्तेलले जानकारी गराउनु भयो । यता मनमोहन प्राविधिक विश्वविद्यालयको केन्द्रिय कार्यालय मोरङमा शोक सभा सम्पन्न गरिएको छ । विश्वविद्यालयका उपकुलपति डा. सुवासश्री पोख्रेलले मनमोहन स्मृति पोलिटेक्निकको स्थापना र सञ्चालन तथा मनमोहन प्राविधिक विश्वविद्यालयको स्थापनामा  स्व. गाेविन्द गजुरेलको योगदानको चर्चा गर्नु भएकाे थियो । विश्वविद्यालयका रजिष्ट्रार डा. दिलनाथ फुएलले शोकपत्र पढेर सुनाउनु भएकाे थियो । कार्यक्रममा मनमाेहन स्मृति पोलिटेक्निकका प्राचार्य इ. सुदिप अधिकारी र अ.लेक्चरर इ. युवराज चौधरीले मन्तव्य राख्दै स्व. गजुरेलको मातहतमा नजिक रहेर काम गर्दा उहाँबाट धेरै कुराहरु सिकिएको बताउनु भयो । कार्यक्रममा विश्वविद्यालयका शिक्षक तथा कर्मचारीहरुको उपस्थिति रहेको थियो ।